Ministrja e Financave, Hykmete Bajrami, mori pjesë në takimin vjetor të FMN-së të kryesuar nga Drejtorja Menaxhuese e FMN-së, Kristalina Georgieva.

Kjo ishte hera e parë që Ministrisë së Financave të Republikës së Kosovës i rezervohet mundësia e adresimit si panelistë në takimin e nivelit të lartë të FMN-së.

Në fjalën e saj, ministrja falënderoi FMN-në për këtë mundësi dhe për mbështetjen në menaxhimin e pandemisë si dhe për bashkëpunimin e ngushtë në fushën e menaxhimit të financave publike dhe ruajtjen e stabilitetit makrofiskal në vendin tonë.

Bajrami foli për sfidat me të cilat po përballet ekonomia e Kosovës në kontekstin e krijuar nga pandemia, duke u përqendruar në nevojën për një politikëbërje adekuate, e cila adreson në mënyrë efektive dhe të shpejt problemet socio-ekonomike e ato shëndetësore të krijuara si rezultat i pandemisë.

Më tej ajo theksoi se Kosova dhe vendet e rajonit duhet të adresojnë në mënyrë të kujdesshme dhe të analizuar mirë hapësirën fiskale si dhe të forcojnë kapacitetin absorbues në mënyrë që financimi i projekteve të prodhojë rezultate pozitive.

Nënvizoi se edhe në periudhën vijuese mbeten sfida të rëndësishme për t’u adresuar, sikurse çështja e parashikueshmërisë, përkatësisht e pasigurisë që ndërlidhet me shkallën e dëmit ekonomik të krijuar nga pandemia tek bizneset si dhe reflektimit të këtij ndikimi te të hyrat buxhetore të shtetit.

Po ashtu u nënvizua se “Në kuadër të politikave tona publike, ne si qeveri duhet të përballemi me dilemat e pashmangshme për të gjetur balancë ndërmjet investimeve publike në shëndetësi, arsim, në sektorin privat dhe në fusha tjera, gjithnjë duke pasur në konsideratë grupet e cënuara dhe kategoritë sociale.”